’t Preuvenemint is e veerdaogs culinair festijn op ’t Vriethof vaan Mestreech. ’t Weurt eder jaor gehawwe in ’t lèste vol weekend vaan augustus, dus op de lèste zoondag vaan augustus en op de drei daog dao-aon veuraofgaond.

’t Preuvenemint 2010 vint dus plaots vaan donderdag 26 augustus tot en mèt zoondag 29 augustus. Op de Vriethof is d’r daan ’n gezèllege opstèlling vaan zoe’n veerteg stands boe me lekker kint ete en drinke, en genete vaan e gevarieerd meziekprogram.

’t Woord “Preuvenemint” is ’n sametrèkking vaan de wäörd “preuve” en “evenemint”. En ’n evenemint boe me kint preuve vaan gooj dinger vaan ’t leve is percijs wat ’t Preuvenemint is.

Ruim daarteg stands fungere es restaurentsje en/of es counterrestaurant; beer en frisdraanke zien te kriege bij veer groete stands, en ’t muzikaal amuzemint weurt veur ’t vootleech gebrach vaanaof ’t kioske vaan de Vriethof.
Dit al maak ’t Preuvenemint vaan Mestreech tot ’t groetste, en mèt veursprungk gezèllegste, ope-loch-restaurant ter wereld. D’n entree is gratis; speciaol Preuvenemint-baankbiljètte (de zoegenaomde preuvenelappe) om d’r eur konzumasies mèt te betaole zien te kriege bij ’n hamfel kassa’s verspreid euver ’t fees-terrein.

De prijze veur beer en frisdraank zien 1 preuvenelap; edere restaurantstand heet minstens ei gerechske dat huugstens 2 preuvenelappe kos; exquis delicatesse zien netuurlek get deurder.
Vaan ’t meziekprogram kint geer gans gratis genete.

De 29ste editie vaan ’t Preuvenemint is te beleve in augustus 2010.

D’n opbrings vaan ’t Preuvenemint geit gans nao gooj doele.

De openingstije vaan ’t Preuvenemint 2010:

donderdag 26 augustus
vaan 18.00 oor tot 02.00 oor

vriedag 27 augustus
vaan 16.00 oor tot 02.00 oor

zaoterdag 28 augustus
vaan 14.00 oor tot 02.00 oor

zoondag 29 augustus
vaan 12.00 oor tot 00.00 oor

’t Struyskommitee is devaan euvertuig tot geer op ’t Preuvenemint ten volle zalt genete!

(klik hei veur VVV Mestreech)